الاثنين، مارس ٠٩، ٢٠٠٩

أوقـــات كتيــــــر


أوقات كتير

أوقات كتير،ياخدني التفكير
في قلب أصبح للدنيا أسير
قدام هواه أصبح كسير
هو العبد وهي الأمير

سقط غريق في بحر الأمل
وحلم الخلود في ذهنه اكتمل
ولحياة أبدية بدأ العمل
و"موت الغد" بقى مستحيل
وظهرت أعراض القلب العليل
في حق نفسه وحق العباد
ظلم نهار ، وظلم ليل

أنا مش بتكلم عن قلب حد
أنا بتكلم عن قلبي أنا
خايف بسببه أملي يتهد
في جنة الخلد ودنيا الهنا

ده مش شعر، ولا أنا شاعر
سميها خواطر، سميها مشاعر
مشاعر خوف مشاعر غضب
خوف من أعمال عمالة تتكتب
خوف من أيام من العمر بتتحسب

خوف من يوم ما هيخرس لسان
وتنطق جوارح بكل اللي كان
وتقول ظلمت، وتقول كدبت
وتقول أنا كنت لأسوأ إنسان

وغضب لحال أمة اتقلب
وبرضه كان قلبي السبب
قلب الحق بشياكة وذوق
رفع الباطل بظلمه لفوق
يا قلبي أصحى بسرعة وفوق

هي سنين ويمكن ثواني
وتسيب الدنيا ومش هترجع تاني
إلا ليوم ثواب وعقاب
على صلاة وصيام وزكاة وحجاب
وحقوق عباد وتخليص حساب
أكسر قيد الدنيا المتين
طير لفوق وأخرج من الطين
تكون رفيق للصادق الأمين
ولو فضلت ليها أسير
وأنت العبد وهي الأمير
أخوف تكون في جهنم سجين